Paartjie glo in wraak-aanval vermoor
2010-07-15 14:11
Bongani Hans
Pietermaritzburg – ‘n Paartjie is Dinsdagaand vermoor in wat moontlik ‘n vyandige bende-aanval was weens ‘n twis wat terugdateer na 2008.
Die lyke van Sipho Nxele (31) en sy 20-jarige vriendin, Masindi Madondo, is omstreeks 20:00 op ‘n voetpaadjie langs Nxele se huis gevind.
Nxele se broer, Xolisani (34), glo die moord hou verband met ‘n bende-twis wat sowat twee jaar gelede onstaan het. Volgens hom was Madondo ‘n onskuldige slagoffer van hierdie wraak-aanval.
“’n Paar uur voordat Sipho en Masindi se lyke gevind is, het iemand ‘n klip teen die deur van die gesin se huis in Uitbreiding 4 gegooi,” het Xolisani gesê.
Hy glo dat hierdie ‘n lokval was om sy broer uit die huis te kry.
“Omstreeks 20:30 het twee van ons bure my na die voetpaadjie geneem waar ek my broer en sy vriendin gevind het. Toe ek besef hulle is dood, het ek begin huil,” het hy gesê.
Na bewering het Nxele na Willowfontein gegaan om sy vriendin, met wie hy reeds verskeie jare in ‘n verhouding was, te gaan oplaai.
Beide slagoffers is van hulle selfone beroof.
Nxele is glo die tweede familielid wat weens die bende-twis vermoor is. Sy neef, Mfundo Kubheka, is verlede jaar doodgesteek.
Xolisani blameer ‘n groep jong mans van Uitbreiding A vir sy broer se dood. Hy glo dat hy ook nou ‘n teiken is vir die bende.
Volgens ao. Joey Jeevan, polisiewoordvoerder, is die slagoffers buite Nxele se huis deur ‘n groep mense voorgekeer.
“’n Argument het uitgebreek en die paartjie is doodgeskiet. Die verdagtes het op die vlug geslaan,” het Jeevan gesê.
Volg Nuus24 op Twitter.
-The Witness