Pa wil eis nadat slang seun by skool byt
2011-03-17 08:28
Kroonstad - ’n Polisieman van die dorp wil ’n skool dwing om sy seun se mediese koste te betaal nadat ’n slang hom by die skool gebyt het.
Geruime tyd lank word die gras op ’n groot gedeelte van die Hoërskool Brentpark se terrein nie gesny nie en dit lok slange, het ao. Bronie Metler Woensdag aan Volksblad gesê.
Hy oorweeg nou regstappe.
Sy seun, Innocent, ’n gr.10-leerling aan dié skool, is na bewering gebyt toe ’n slang juis uit die lang gras voor ’n klaskamer na dié gebou geseil het.
Metler jr. moes vyf inspuitings kry – een in sy arm en vier op sy boud – en is in die Netcare-Kroon-hospitaal opgeneem.
Die slang was vermoedelik ’n skaapsteker.
Metler jr. en ander leerlinge het verlede week voor ’n klaskamer gesit. Die grasperk is sowat ’n meter van die klaskamer af.
“My niggie Thabang (17) het skielik vir my gesê daar is ’n slang agter my.
“Ek en my maats het omgedraai waarna ek die slang agter die kop getrap en aan sy stert gevat het.”
Die ander kinders het glo ’n leë glasbottel opgetel wat in die gras gelê het.
Metler jr. het die slang in dié grondboontjiebotterbottel probeer sit toe hy gebyt is. “Dit het gebrand en ek het geskrik.”
Metler jr. het vir ’n onderwyseres daarvan vertel, wat hom glo aangeraai het om te kla as hy later sleg voel.
Toe hy bykans ’n uur later wel begin sleg voel, het die skool Metler sr. gebel.
“Presies ’n uur en 45 minute nadat my seun gepik is, bel die skool my eers.
“Hulle moes hom dadelik by ’n dokter gekry het.”
Metler het sy seun eers na ’n kliniek gebring, daarna na ’n dokter en toe na die hospitaal.
Metler jr. is opgeneem en nagenoeg 20 uur later ontslaan.
Metler sr. sê dit is skreiend dat die skool nie sy terrein netjies hou nie.
Slegs ’n gedeelte van die grasperk word gesny. Met Volksblad se besoek het die gras voor ’n ry klaskamers minstens 30cm hoog gestaan.
Die departement van onderwys sal na verwagting vandag kommentaar lewer oor die onnet toestand by die skool.
- Volksblad