Pa wat sy kind ontvoer, gevind
2011-01-31 07:41
Kimberley - Ná tien dae op die vlug is ’n man, wat sy tweejarige dogter in Durban ontvoer het, deur verskeie eenhede van die polisie en private speurders in Kimberley vasgetrek.
Die meisie, Isabella Krog, is dadelik na ’n plek van veiligheid gebring. Haar ma, Catherine Krog (27), het intussen met ’n huurvlug van Durban via Bloemfontein gevlieg om by ’n plek van veiligheid in Kimberley met haar kind herenig te word.
Krog was oorstelp van vreugde toe sy haar kind Vrydag om 22:40 in Kimberley omhels. “Ek was so gelukkig, en so dankbaar. Dit was die ongelooflikste dag in my lewe,” het sy aan Volksblad gesê.
Klagte van ontvoering, verontagsaming van ’n hofbevel en die gebruik van ’n voertuig sonder die eienaar se toestemming word teen ’n 49-jarige man ondersoek.
Die man en mev. Krog bly nie meer bymekaar nie en ’n hofbevel vir toesig is uitgereik. Daarvolgens mag die pa Isabella op Dinsdae by die dagsorgsentrum oplaai en haar die volgende oggend terugbring.
Isabella is op Dinsdag 18 Januarie by die dagsorgsentrum opgelaai, maar nie die volgende oggend teruggebring nie. Die man en sy dogter was sedertdien weg.
Die polisie het op 27 Januarie op SABC-TV ’n beroep op mense gedoen om op die uitkyk te wees vir die twee.
Die motor wat hy na bewering van ’n vriend geneem het, is met ’n Tracker-opspoorstelsel toegerus. Die polisie het dié maatskappy gevra om dit weer te aktiveer en binne drie minute is die motor in Kimberley opgespoor, sê ’n Tracker-verteenwoordiger.
Die Kimberley-polisie se lugspan, die blitspatrollie, honde-eenheid en eenheid vir sigbare polisiëring is ingeroep. Die man en Isabella is om 19:00 by een van sy familielede se huis in Roylglen gevind. Die man is in hegtenis geneem, en Isabella na ’n plaaslike kinderhuis gebring.
Die Brad Nathanson-span private speurders, wat saam met die polisie aan die saak gewerk het, het onmiddellik ’n huurvlug gereël. Die ondersoekbeampte van die Berea-polisiekantoor het saam met mev. Krog na Bloemfontein gevlieg, waar die Kimberley-polisie haar om 22:40 met Isabella herenig het.
Die polisie vermoed die man was van plan om sy dogter oorsee te neem nadat paspoorte in sy besit gevind is.
Die man verskyn vandag in die Kimberley-landdroshof.
Genl.maj. Japie Riet, adjunkpolisiekommissaris in die Noord-Kaap, het sy dank aan alle polisielede, die opsporingsmaatskappy, die private speurders en die gemeenskap uitgespreek vir hul hulp in die soektog.
- Volksblad