Pa vlug met lieflingdogter
2009-07-17 13:14
Le Roux Schoeman
Kaapstad – Ná ’n dag van hoogdrama is ’n pa gistermiddag laat by Richmond in die Karoo vasgetrek nadat hy vroegoggend sy lieflingdogter glo met geweld uit haar ma se sorg verwyder het.
Mnr. Marius Ludick (37), ’n werklose grafiese ontwerper van Kuilsrivier, is aangekeer toe hy en sy driejarige dogter, Nadia, by Richmond deur verkeersbeamptes voorgekeer is.
Nadia se verligte ma, mev. Melanie Ludick van Olyfstraat, Kuilsrivier, mev. Ludick se pa, mnr. Kobus Nagel, en ander familielede het gisteraand na Richmond vertrek om haar te gaan haal.
Die drama het gisteroggend vroeg begin toe mnr. Ludick sy vervreemde vrou omstreeks 06:00 gebel het.
’n Sigbaar ontstelde mev. Ludick het gister gesê sy het vir haar man, met wie sy sedert Februarie in ’n bitter egskeidingsgeding gewikkel is, gesê om met haar prokureur te praat. Sy het daarna minstens ses van sy oproepe geïgnoreer. Toe hy kort daarna stilhou voor die huis waar hulle eens saamgewoon het, het sy vermoed dat iets fout is en die kinders se slaapkamerdeure gaan toetrek.
Mev. Ludick, met kneusmerke wat aan haar keel sigbaar was, het gesê mnr. Ludick het die deur oopgeskop en haar gewurg in die televisiekamer, waar foto’s van die paartjie nog teen een van die mure hang. Volgens haar het hy gesê: “Gee my jou selfoon. Gee my die selfoon. Ek gaan jou vermoor. Ek sal jou wys hoe vermoor ek jou.”
Sy het toe na die bure gevlug. Mnr. Ludick het glo vir Nadia, oor wie hy “baie erg” is, gegryp en met haar weggery.
Die vermoede was dat mnr. Ludick, wat oorspronklik van Klerksdorp is, in ’n noordelike rigting met sy kind gevlug het.
Om 18:00 het sers. Isaac Lucas, die ondersoekbeampte in die saak, bevestig dat hy vasgetrek is en die kind, wat in nagklere geklee was, veilig is.
Kapt. Isaac van Niekerk, woordvoerder van die Kuilsrivier-polisie, het gesê ’n aanklag van aanranding, huisbraak met die doel om aan te rand en diefstal van ’n selfoon word teen mnr. Ludick ondersoek.
Volgens hom het mev. Ludick vroeër ’n voorlopige beskermingsbevel teen haar man bekom en het hy met sy optrede gister die voorwaardes daarvan oortree.
Van Niekerk het gesê ’n aanklag van ontvoering word nie ondersoek nie omdat mnr. Ludick Nadia se biologiese pa is en – hoewel die egpaar van mekaar vervreem is – die hof nie beslis het dat hy die kind nie mag sien nie.
Die egpaar is ses jaar gelede getroud.
Nadia se babasuster, Natasja, is intussen in ’n vriendin se sorg geplaas.
Die Burger