Pa verwurg glo seun (13)
2010-06-22 08:37
Sonja van Buul, Beeld
Johannesburg - ‘Ek het jou seun sopas vermoor. Kom haal hom.”
Met dié woorde het Margareth Granny Kotjane (41) van Sebokeng op Vadersdag van haar seun, Itumeleng (13), se dood verneem.
Die polisie het Molefi Elijah Ace Kotjane (49), haar gewese man van Boipatong, Sondagoggend kort ná die oproep in hegtenis geneem nadat hy Itumeleng vermoedelik verwurg het.
Volgens Kotjane is sy en Itumeleng se pa in Januarie geskei, maar was daar steeds onmin oor onderhoud tussen hulle.
“Vrydag het hy my gevra of Itumeleng en Karabo (6), ons dogtertjie, by hom mag kom kuier. Karabo het gehuil, gesê sy is bang vir hom en sy wil nie gaan nie,” het Kotjane huilend aan gesê.
Dié ekonomie-onderwyseres by ’n skool in Bophelong buite Vanderbijlpark het vertel sy het Itumeleng Saterdag alleen na sy pa geneem en later die aand gehoor hy slaap by sy pa oor.
Later het Itumeleng ’n SMS gestuur om te laat weet “alles is reg”.
“Sondagoggend was ek baie bekommerd oor sy veiligheid toe ek Itumeleng ’n SMS gestuur het, maar hy nie daarop gereageer het nie. Ek het hom in verskeie boodskappe gevra om my dringend te bel, maar hy het nie geantwoord nie.”
Kotjane se ergste vrese is bewaarheid toe haar gewese man sowat ’n uur later bel en sê hy het Itumeleng vermoor.
“Ek wou my ore nie glo nie, my verstand wou sy woorde nie verstaan nie en ek het my selfoon na ’n buurvrou geneem. My eksman het sy woorde aan haar herhaal.”
Sy het by die Boipatong-polisiekantoor gehoor haar seun is vermoedelik verwurg.
By die moordhuis in Boipatong het sy haar voormalige man agterin ’n polisievangwa sien sit. “Hy het sonder gevoel na my gestaar en nie ’n woord gesê nie.
“Hy het baie keer gedreig, maar ek het nie gedink hy sou so ver gaan nie.
“Ek dink hy wou my seermaak.”
Sy het Itumeleng as ’n stil, onderdanige kind beskryf wat altyd geglimlag het en baie geheg aan haar was.
“’n Familielid van die pa het die moord van die seun by die polisie aangemeld,” het ao. Kinnie Steyn, polisiewoordvoerder, gister gesê.
Die polisie ondersoek volgens haar die moord.
Die pa, ’n laboratoriumassistent by Cape Gate, sal na verwagting vanoggend in die Vanderbijlpark-landdroshof verskyn.
- Beeld