Pa, seun steeds in Mosambiek vermis
2012-11-12 15:21
Video - Pa en seun steeds soek
Die soektog duur voort na 'n Suid-Afrikaanse pa en seun wie se vliegtuig vyf dae gelede oor Mosambiek verdwyn het.
KYK
Johannesburg – Die lugvaartgemeenskap het bymekaargekom om finansiële hulp te verleen vir die soektog na die twee Suid-Afrikaanse mans wie se vliegtuig meer as twee weke gelede in Mosambiek vermis geraak het.
Bryan Simms (60) van Midrand, Johannesburg, en sy seun, Rob (22), is sedert 27 Oktober vermis.
Hulle het vanaf Malawi na die Lanseria-lughawe, noord van Johannesburg, gereis. Die vliegtuig het laas naby Beira in Mosambiek met beheertorings kontak gemaak.
Kort voor die vliegtuig verdwyn het, het Simms sr. in 'n radioboodskap gesê daar is probleme met een van die enjins.
Richard Maier, 'n vlieënier wat tans die soektog na die vermiste vliegtuig lei, het Maandag aan News24 gesê hy ken nie die mans nie, maar het verplig gevoel om aan te hou soek nadat lugvaartowerhede die soektog afgelas het.
"As dit ek is wat weg was...sou ek wou hê dat mense steeds aanhou soek."
Maier se skoonpa het 'n paar jaar gelede in 'n soortgelyke situasie vermis geraak.
Lede van die lugvaartgemeenskap het reeds sowat R200 000 uit hul eie sakke betaal om met die soektog te help.
Maier het gesê hy bied 'n beloning van R43 000 aan enigiemand wat die soekspan na die toneel van die vliegwrak kan lei.
Volg Nuus24 op Twitter.
– News24
- SAPA
