Pa in hof wat baba in motor los
2012-02-08 20:59
Kaapstad – ‘n Pa van Kaapstad het Woensdag in die hof verskyn op aanklag van kinderverlating nadat ‘n nege maande oue baba in ‘n motor wat gesluit was gelos is in Wynberg.
Eyewitness News het berig die man, Cebo Ncube (33), het vlugtig in die Wynberg-landdroshof verskyn, waar die saak tot Maart uitgestel is.
‘n Verbyganger het Dinsdagmiddag die baba in die besige parkeerarea gehoor huil en die polisie gekontak, het ao. November Filander gesê.
Die babaseun is naby die openbare biblioteek in die motor gelos, met temperature wat tot 26 grade Celcius gestyg het.
Ncube se vrou was in dié stadium by die departement van maatskaplike dienste. Sy is ondervra, maar later vrygelaat.
Die motor se venster is gebreek om die baba uit die warm voertuig te haal.
Volgens EWN het die landdros Ncube gewaarsku dat dit ‘n ernstige kwessie is.
Die saak is uitgestel vir verdere ondersoek.
Ncube is uit aanhouding vrygelaat.
- Volg Nuus24 op Twitter
- SAPA