Pa hoop nog op terugkeer van ontvoerde seun
2012-01-27 16:55
Johannesburg – Die pa van ‘n Suid-Afrikaanse man wat in November in Mali ontvoer is, is steeds hoopvol dat sy seun vrygelaat sal word, het hy Vrydag gesê.
“Ons hoop steeds hy sal huis toe kom, maar ons het nog niks gehoor sedert sy foto in ‘n buitelandse koerant verskyn het nie.”
Die foto van die 36-jarige man – wie se naam nie bekend gemaak kan word nie, aangesien dit toekomstige onderhandelinge met die ontvoerders in die wiele kan ry – is aan die regering in Mali gestuur deur Al-Kaïda se tak in Noord-Afrika.
Die terroristegroep het die foto in Desember gestuur om aan te dui dat hy nog lewendig is en om hul bewering dat hulle verantwoordelik vir die ontvoering is, te staaf.
Die man se pa het gesê die familie wil hê daar moet “meer optrede van die [Suid-Afrikaanse] regering wees” om hul seun veilig tuis te bring.
Die Suid-Afrikaner was een van drie toeriste wat deur skieters ontvoer is in ‘n restaurant in Timbuktu. Die ander twee toeriste was ‘n Sweed en ‘n Nederlander, het die Associated Press in dié stadium berig.
‘n Duitser, wat geweier het om saam te werk toe die mans hul in ‘n vragmotor in wou druk, is tereggestel.
Hulle is op 25 November as vermis aangemeld.
Clayson Monyela, woordvoerder van internasionale betrekkinge en samewerking, het gesê daar is geen nuwe verwikkelinge in die saak nie, alhoewel die Suid-Afrikaanse ambassade met die owerhede in Mali saamwerk om die man te probeer vind.
- Volg Nuus24 op Twitter
- SAPA