Pa dagvaar minister oor baba se breinskade
2011-05-05 14:53
Johannesburg – Die pa van 'n baba wat vermoedelik breinskade opgedoen het weens 'n staathospitaal se nalatigheid kan voortgaan met 'n skadevergoedingseis van R15,6 miljoen teen die provinsiale minister van gesondheid, het The Citizen berig.
Lodewyk Christoffel Smith sal toegelaat word om voort te gaan met die eis hoewel dit nie binne ses maande ná die voorval ingedien is nie, het regter Bert Bam beslis.
Smith se vrou, Susanna, was 30 weke swanger toe sy in April 2004 na die Pretoria-Wes-hospitaal gegaan het. Die privaathospitaal het haar huis toe gestuur en aangesê om in 'n warm bad te klim en panado te drink.
Sy het toe na die Kalafong-hospitaal gegaan waar haar pyn en naarheid vererger het. Haar baba, Tommie, is dieselfde dag in dié hospitaal gebore.
Smith baseer sy eis op die bewering dat albei hospitale nalatig was in hul behandeling van sy vrou en seun.
Die Kalafong-hospitaal het glo 'n suigapparaat gebruik om die geboorte te bespoedig. Dít kon dalk die breinskade veroorsaak het.
Smith beweer die personeel het versuim om 'n nota te maak van Tommie se toestand en het hom te gou van die suurstof afgehaal.
Die eis van R15,6 miljoen is hoofsaaklik vir sy seun se toekomstige mediese benodighede, verlies van inkomste en 'n kurator wat na Tommie se finansiële behoeftes kan omsien.
Die provinsiale minister het erken dat 'n suigapparaat tydens Tommie se geboorte gebruik is, maar ontken bewerings van nalatigheid.
Volg Nuus24 op Twitter
- SAPA