Pa dagvaar dept. ná dogter se verkragting
2012-08-13 12:15
Kaapstad – Die pa van ‘n meisie wat by haar skool se nasorg deur ‘n opsigter verkrag is, sal die Wes-Kaapse onderwysdepartement vir minstens R2 miljoen in skadevergoeding dagvaar, is Maandag berig.
Die Cape Times berig dat die pa Vrydag toestemming by die Wes-Kaapse hooggeregshof ontvang het om regstappe te neem.
Die man, wat nie genoem kan word nie om sy dogter se identiteit te beskerm, het aanvanklik nie daarin geslaag om die departement betyds in kennis te stel van sy voorneme om te dagvaar nie.
Nietemin is ‘n aansoek om die laat indiening van die kennisgewing te verskoon, onbestrede en is dit deur die hof toegestaan.
Die meisie, wat sewe jaar oud was toe die voorval plaasgevind het, is in Maart 2005 verkrag terwyl sy by ‘n nasorg in die noordelike voorstede was.
Die opsigter, Bronwill Daniels, is in Maart 2008 skuldig bevind aan die misdaad en dien tans ‘n lewenslange vonnis uit.
Volgens die verslag beweer die pa dat beamptes van die skool nie hul pligte nagekom het nie, aangesien hulle nie behoorlik na sy dogter omgesien het nie.
Dit het daartoe gelei dat die opsigter haar verkrag het “terwyl sy veilig verskans was in die klaskamer”.
– Volg Nuus24 op Twitter
- SAPA
