Oupa se lyk gevind toe hy nie by skool opdaag
2013-02-15 10:31
Johannesburg – ’n 75-jarige oupa is dood in sy huis in Weltevredenpark, Roodepoort, gekry nadat hy nie sy kleinkinders by die skool gaan haal het nie, Beeld.
Ao. Karen Jacobs, polisiewoordvoerder, het gesê Derek Cornelius se dogter, Lindsay, het sy lyk Woensdag in die hoofslaapkamer gekry. Sy en haar twee kinders woon by haar ouers.
“Die oom gaan haal die kinders altyd ná skool. Onraad is vermoed omdat hy dit gister (Woensdag) nie gedoen het nie. Sy dogter is huis toe, waar sy haar pa gekry het.”
Volgens Jacobs is Cornelius weens aanranding dood.
’n Lykskouing is Donderdag gehou. Die presiese oorsaak van sy dood was teen druktyd nog onbekend.
“Daar is geen tekens van gedwonge toegang nie, maar twee selfone en 'n XBox is gesteel."
“Niemand het enigiets gesien nie,” het Jacobs gesê.
Die polisie ondersoek klagte van moord en huisroof.
'n Buurman wat gevra het dat sy identiteit nie bekend gemaak word nie, het gesê dit was die eerste keer dat die Cornelius-gesin slagoffers van misdaad was.
Volgens hom is misdaad die laaste ruk ’n groot probleem in Weltevredenpark, ondanks groter sigbare polisiëring in die gebied.
“Hierdie is ’n goeie woonbuurt, maar inwoners is bekommerd.
“Ek hoor sprake dat mense hulself wil bewapen.”
– Volg Nuus24 op Twitter
- SAPA
