Ouma wen R1,2 miljoen by casino
2010-10-20 08:38
Welkom - ’n Bejaarde weduwee wat sonder inkomste vir haar vyf kleinkinders sorg, is die grootste wenner wat die Goldfields-casino in Welkom sover opgelewer het.
Die casino se progressiewe boerpot het verlede Vrydag meer as R1,2miljoen aan haar uitbetaal.
Die Vrystaatse vrou (68) wat nie geïdentifiseer wil word nie, het geen benul gehad wat gebeur toe sy die boerpot wen nie. Eers toe personeel van die casino haar kom haal het tussen die skare mense wat om haar begin saamdrom het, het sy besef dat sy iets gewen het. Sy het aanvanklik nie besef hoe groot die boerpot was nie. Sy het net R40 gebruik om mee te dobbel.
“Ek is baie bly en kan nie glo wat God vir my gedoen het nie,” sê sy.
Sharika Betts, woordvoerder, sê dit is die grootste uitbetaling nog by die casino sedert dit in 2003 geopen het. Die vorige groot uitbetaling was R269000.
Die progressiewe boerpot het die afgelope vier jaar klein bedrae uitbetaal, maar die vrou was gelukkig, omdat sy gespeel het met die volle nege muntstukke wat die dobbelmasjien vereis.
Betts sê die bestuur van die casino het finansiële adviseurs aan die vrou beskikbaar gestel, maar dit bly haar keuse wat sy met haar wengeld gaan doen.
Die vrou, wat nie Afrikaans of Engels kan praat nie, het in Sotho aan Anastacia Khetsi van Volksblad se gemeenskapskoerant Vista gesê dit was maar die vyfde keer dat sy haar geld by die casino waag en sy gebruik nooit groot bedrae geld daarvoor nie.
Sy is die ma van ses dogters, van wie twee reeds dood is. Sy sorg vir die twee oorlede dogters se vyf kinders wat tussen 9 en 17 jaar oud en nog op skool is.
Sy is ongelooflik bly oor die wengeld en gaan dit gebruik om haar beskeie huis mee op te knap en om toe te sien dat haar vyf kleinkinders die geleentheid tot geletterdheid het.
Haar man is verlede jaar dood en sy help deeltyds met administrasie by ’n begrafnisonderneming in die woonbuurt waar sy bly, maar sy word glad nie daarvoor betaal nie.
- Volksblad