Ouma sterf toe huis se mure omval
2010-10-29 18:27
Johannesburg – ‘n 69-jarige vrou is dood toe die mure van haar huis inmekaargeval het tydens ‘n storm in die Sunnyside-informele nedersetting naby Tzaneen, het die departement van plaaslike regering en behuising, gesê.
“Die slagoffer, Maria Mathole, laat vyf kleinkinders (tussen die ouderdomme van agt en 15) agter,” het Clayson Monyela, woordvoerder, gesê.
“Ons moet nou bepaal of die kinders enige ander familielede het by wie hul kan woon. Die regering sal ook verseker dat die kinders ‘n huis kry omdat hul woning tydens die storm verwoes is,” het Monyela gesê.
Erge storms het die Limpopo-provinsie Donderdag en Vrydag geteister.
Volgens Monyela is sowat 150 tot 200 gesinne deur die storms geraak. “Hulle huis is gedeeltelik of heeltemal tydens die storms verwoes. Heelparty mense soek nou skuiling in gemeenskapsale en tente."
Volg Nuus24 op Twitter.
- SAPA