Ouma, kleuter stabiel ná skietery by winkelsentrum

2012-06-17 12:40

Johannesburg – 'n Kleuter en sy ouma is in 'n stabiele toestand ná hulle tydens 'n gewapende rooftog by die Randridge-winkelsentrum in Gauteng geskiet is, het die Gautengse polisie Sondag gesê.

'n Ander lid van die publiek en 'n polisiebeampte is ook in Saterdag se rooftog beseer.

"Drie van die mense in die hospitaal se toestand is as stabiel beskryf," het lt.kol Lungelo Dlamini, die polisiewoordvoerder, gesê.

Die bejaarde en haar kleinseun is albei in die been geskiet. Die vierde slagoffer, 'n man, is op die toneel vir 'n wond aan die kant van sy maag behandel.

'n Groep van nege gewapende mans het 'n juwelierswinkel by die winkelsentrum Saterdag beroof, en het van die toneel gevlug in 'n bakkie.

Vier mans is ná 'n jaagtog in hegtenis geneem. Vyf het ontsnap, en word deur die polisie gesoek.

Die vier verdagtes sal Maandag in die Randburg-landdroshof verskyn.

– Volg Nuus24 op Twitter.

- SAPA