Ouma in hospitaal ná kobra haar pik

2012-11-22 11:36

Johannesburg – ‘n Bejaarde vrou van Boksburg aan die Oos-Rand word in ‘n hospitaal behandel nadat ‘n Mosambiekse spoegkobra haar op ‘n plaas naby Bela-Bela gepik het.

Beeld berig Sannie Haywood (78) is by haar dogter se huis op haar regtergroottoon gepik en is tans in Pretoria se Muelmed Hospitaal se hoësorgeenheid.

Haar dogter, Magda Botha, sê hulle het in die sitkamer gekuier toe haar ma sê: “Wat steek my nou so?”

Daarna het die dogter gesien hoe die slang verby die rusbank seil. Botha se man het toe die slang met ‘n graaf doodgekap.

“Ons het groot geskrik, maar ons het nie dadelik besef my ma is gepik nie.”

Haywood is toe na die hospitaal gehaas, waar sy ‘n operasie ondergaan het.

Mosambiekse spoegkobras se gif is sitotoksies, wat selle en weefsel vernietig.

Botha sê haar ma is in ‘n stabiele toestand. Van die dooie weefsel aan haar toon is tydens die operasie afgeskraap.

Haywood sal vir minstens nog ‘n week in die hospitaal moet bly.

Volg Nuus24 op Twitter 

- SAPA