Ouma hang haar ná moord op twee
2011-06-15 07:07
Pretoria – ’n Ouma van Centurion wat glo haar seun doodgeskiet en haar 16 maande oue kleinseun versmoor het, het haarself opgehang nadat die polisie haar “verloor” het.
Die polisie kon Caryallan Irene Anagnostatos (51) nie opspoor nie nadat sy van een hospitaal na die volgende rondgeskuif is.
Beeld het op 20 April berig oor die voorval waarin Anagnostatos vermoedelik haar polse gesny en haarself bo die bad probeer ophang het nadat haar seun en kleinseun dood is.
Anagnostatos is nooit in verband met haar seun, Steven Bill Anagnostatos (29), en haar kleinseun, Santino Anagnostatos (16 maande), se dood in hegtenis geneem nie.
’n Veiligheidswag van die Valley View-spogkompleks in Kosmosdal by Samrand het op 19 April op dié grusame toneel in me. Anagnostatos se huis in Pimpinellasingel afgekom.
Me. Anagnostatos was ’n lid van die beheerraad van dié spogkompleks oorkant die Blue Valley-gholflandgoed.
Mnr. Anagnostatos is dood in sy bed gevind. Hy is in die kop geskiet.
Santino het nog in sy stootwaentjie gelê en is versmoor.
Die stootwaentjie het in die gang naby die badkamer gestaan waar me. Anagnostatos in die bad haar polse gesny en haarself probeer hang het.
Die veiligheidswag het haar lewe gered.
Kapt. Agnes Huma, polisiewoordvoerder, het gister gesê me. Anagnostatos is, nog voordat die polisie op die toneel gekom het, per helikopter na die Unitas-hospitaal in Centurion geneem.
“Die polisie het haar na die Unitas-hospitaal gevolg, maar hulle kon haar nie by die hospitaal kry nie,” het Huma gesê.
“Sy is na bewering na die Kalafong-hospitaal (in Atteridgeville, wes van Pretoria) oorgeplaas.
“Die polisie kon haar daar ook nie kry nie. Hulle is toe na die Tshwane-distrikshospitaal waar hulle uitgevind het dat sy ontslaan is.
“Die polisie het inligting opgevolg oor waar die vrou kan wees.
“Hulle het toe uitgevind sy het haarself by ’n vriend se huis in Glenhazel, Sandringham in die noorde van Johannesburg, gehang.”
Dit is nie bekend presies wanneer me. Anagnostatos selfmoord gepleeg het nie.
Huma het gesê die saak is nie gesluit nie en daar word steeds ondersoeke, onder meer moord en ’n geregtelike doodsondersoek, gedoen.
Volg Nuus24 op Twitter
- Beeld