Ouers wat tug, is nié boewe, sê die AGS
2012-02-03 09:04
Johannesburg – Die gedagte dat die regering ouers wat hul kinders ’n pak slae gee tot misdadigers verklaar, is belaglik en rampspoedig, sê die Apostoliese Geloof-sending (AGS).
Dr. Isak Burger, president van dié kerk, sê in ’n verklaring hulle erken dat daar onverantwoordelike ouers is wie se metodes om hul kinders tuis te dissiplineer op mishandeling neerkom.
Dis egter onwaarskynlik dat sulke ouers deur so ’n stap afgeskrik sal word.
Verder bevat die Bybel talle voorskrifte oor die belangrikheid van billike en liefdevolle dissipline. Daar word trouens gewaarsku dat dit vir kinders rampspoedig kan wees as ouers nalaat om dit te doen.
Burger sê daar is ’n reuse-verskil tussen ouerlike dissipline en kindermishandeling. Om ouers wat hul plig nakom deur hul kinders te dissiplineer tot misdadigers te verklaar, is verregaande.
Dr. Gustav Claassen, moderator van die NG Kerk se Noordelike sinode, het by navraag gesê dié kerk het nie sinodebesluite oor die saak nie.
Hy dink egter ’n mens moet mooi kyk na wat straf of tug in die Bybel beteken het en of dit noodwendig neerkom op lyfstraf.
Dis maklik om Bybeltekste aan te haal, maar ’n mens kan nie sommer ’n is-gelyk-aan-teken plaas tussen destyds en nou nie.
Persoonlik is hy nie ten gunste van lyfstraf nie.
Ds. Cassie Aucamp, predikant van die Gereformeerde kerke Bergsig en Andeon, sê in die Gereformeerde Kerke in Suid-Afrika is daar ook nie ’n sinodebesluit nie, maar die gangbare standpunt by hulle is dat ’n pak slae op sy tyd reg is.
Dit moet egter binne perke en met matigheid gebeur en met billikheid en liefde gedoen word.
Van die Bybeltekste wat in dié gesprek ter sprake kom, is Spreuke 13:24 (Wie sy seun nie straf nie, het hom nie lief nie; as hy hom liefhet, sal hy hom straf wanneer dit nodig is) en Spreuke 29:15 (’n Pak slae en teregwysing bring wysheid; ’n kind wat sonder dissipline grootword, steek sy moeder in die skande).
– Volg Nuus24 op Twitter
- Beeld