Ouers vermoor glo hul baba
2010-08-22 17:51
Johannesburg – ‘n Getroude paartjie van Bloemfontein is in hegtenis geneem nadat hulle glo hul sewe maande oue baba vermoor het, het die Vrystaatse polisie Sondag gesê.
Volgens Harry Nagel, ‘n polisiewoordvoerder in die Vrystaat het die ma Woensdagaand ‘n ambulans gekontak en gesê die baba het ‘n warme pot vol pap op haarself laat uitval en gebrand.
“Paramedici het die kind met brandwonde gevind. Maar daar word vermoed die ouers het die pap oor die kind uitgegooi nadat sy reeds gesterf het om die moord toe te smeer,” het Nagel gesê.
Die kind is met haar aankoms by die hospitaal dood verklaar.
‘n Nadoodse ondersoek het getoon die kind het nie weens brandwonde van die warme pap gesterf nie, en Nagel wou nie die uitslae van die ondersoek bekend maak nie omdat die saak steeds in ‘n sensitiewe stadium is.
Die kind se 35-jarige pa en 28-jarige ma van Mangaung is Vrydag gearresteer en sal Maandag in die landdroshof op Bloemfontein verskyn op aanklag van moord.
- Volg Nuus24 op Twitter.
- SAPA