Ouers soek antwoorde oor baba se gru-dood
2009-11-26 08:38
Linda de Beer
Potchefstroom – Baba Lemeel Booysen, wie se kop en arms van sy lyfie geskeur het terwyl sy ma ure lank in kraam was, is Woensdag begrawe sonder dat sy ouers weet wat sy dood veroorsaak het.
Die lykskouing op Lemeel is eers Woensdagoggend afgehandel, het Kathy Randeree, uitvoerende hoof van die Klerksdorp-hospitaal, gister gesê.
Die lykskouingsverslag sal eers oor ’n week of wat beskikbaar wees.
Faiza Booysen was verlede Dinsdag ure lank in kraam terwyl dokters en verpleegpersoneel gespook het om haar yslike groot baba van 4,7 kg te verlos.
’n Keisersnee is om dié rede oorspronklik vir die Woensdag geskeduleer, maar dokters het die Maandag bevind Lemeel is in sy ma se baarmoeder dood.
Daar is toe besluit op ’n gewone geboorte om Booysen glo die trauma van ’n keisersnee te spaar.
Lemeel se kop en arms het gedurende die bevalling van die res van sy lyf geskeur.
Die rede is glo omdat sy liggaam reeds begin ontbind het.
’n Manlike leerlingverpleër het volgens Randeree verwarring veroorsaak deur vir Booysen te sê om “te druk, want die baba raak moeg”.
Booysen het om dié rede geglo Lemeel leef nog.
Donovan Booysen, Lemeel se pa, het gesê hy kry nagmerries sedert hy sy seun se lyk gesien het met die littekens waar die kop en arms weer aangewerk is.
- Die Burger