Ouers snak oor gelde
2011-11-30 09:05
Pretoria – Selfs ouers wat ’n gesamentlike bruto-inkomste van tot soveel as R630 000 per jaar verdien, kom in aanmerking vir afslag op skoolgeld in openbare skole wat van die duurste in die land is.
Die styging van skoolgelde wat volgende jaar gemiddeld 10% of hoër is, het sommige ouers gister ontstig.
’n Paar ouers wat meen hulle kan nie die buitensporige hoë skoolgelde bekostig nie, het gesê dié tendens sal nie uitgeroei word solank skole teen mekaar meeding en wil kyk wie die meeste sportakademies, beste afrigters en geriewe kan hê nie.
Beeld het Dinsdag verwys na skole waarvan die skoolgelde baie hoër is as die nasionale gemiddeld van R5 000 per jaar per kind.
In ’n ontleding wat gedoen is volgens die regulasies vir skoolgeld-kwytskelding is bevind ouers met ’n gesamentlike inkomste van R500 000 per jaar is geregtig op 3,16%-afslag op skoolgelde van R15 800 per jaar.
Dit is R499,28. Die ouers van ’n kind in ’n skool wat R19 500 skoolgeld per jaar vra, kan R760,50-afslag kry. Ouers wat R630 000 per jaar verdien, kan in die eerste skool se geval R396,25 se afslag kry en in die tweede R603,57. (Sien hiernaas hoe die formule werk.) ’n Ouer van ’n gegoede skool in Pretoria wat anoniem wil bly, het gesê baie ouers is onbewus dat hulle in aanmerking kom vir skoolgeld-kwytskelding en doen hulself en hul kinders ’n onreg aan in ’n poging om die hele bedrag te betaal.
Paul Colditz, uitvoerende hoof van die Federasie van Beheerliggame van Suid-Afrikaanse Skole (Fedsas), het gesê ouers kan nie oor skoolgelde kla nie omdat hulle dit self bepaal. Hy het gesê ouers moet die jaarvergadering bywoon en beswaar aanteken teen items wat hulle meen onnodig voor begroot word.
Colditz meen ’n situasie van “trying to keep up with the Joneses” onder sekere ouers lei daartoe dat hulle vergeet dat alles wat hulle begroot uit die skoolgeld betaal moet word.
Dr. Elda de Waal, ’n onderwyskenner verbonde aan die Noordwes-Universiteit, meen skole moet kinders uitdaag om hul potensiaal te ontwikkel. “Die probleem is dat sommige skole perspektief verloor oor tot op watter vlak hulle moet gaan om kinders uit te daag.
“ ’n Rolls-Royce is nie altyd nodig om ’n doelwit te bereik nie. Iets is ernstig in openbare skole verkeerd as dit nie langer meer oor die gemiddelde kind met die gemiddelde ouers gaan nie. Dan het ons die hele punt van openbare onderwys gemis.
“Ons moet steeds onthou hoe Suid-Afrika lyk en dat openbare skole ruimte vir ander kinders moet maak,” meen sy.
Graeme Bloch, onderwysontleder, meen hoe meer geleenthede daar vir kinders is, hoe beter.
Hy glo nie ’n skool moet sy begroting sny as hy ’n Astro-baan kan bekostig nie. “Ons moet liewer poog om meer kinders geleenthede en toegang tot sulke geriewe te gee.”
– Volg Nuus24 op Twitter
- Beeld