Oudste verkragsaak hervat
2011-03-07 08:45
Johannesburg - Die oudste verkragtingsaak, sover bekend, in die land se regsgeskiedenis begin Maandag in die streekhof in Kimberley.
Die beweerde verkragting het reeds meer as 42 jaar gelede plaasgevind.
Die klaagster, PB van Pretoria, mag nie verder geïdentifiseer word nie. Sy is nou 56 jaar oud en was 13 toe sy na bewering deur PE, ’n vriend van haar ouers, verkrag is.
PE mag ook ingevolge die Strafproseswet nie geïdentifiseer word voordat hy gepleit het nie. Hy is nou 74 jaar oud en ’n bekende sakeman van Kimberley.
Volgens vroeëre hofstukke het PB dekades lank oor die verkragting geswyg, totdat sy self enkele jare gelede in die tronk beland het. Dáár het sielkundiges haar die eerste keer ingelig dat sy steeds deur die beweerde verkragting getraumatiseer word en het sy besluit om ’n klag teen PE in te dien.
Daar het egter ’n steil pad op haar gewag. Die Nasionale Vervolgingsgesag het geweier om te vervolg omdat die saak so oud is. Sy het toe in die Noord-Kaapse hooggeregshof aansoek gedoen om magtiging om ’n private vervolging in te stel.
Dit is geweier, onder meer omdat PE se betoog aanvaar is dat van sy getuies al dood is en dokumente vir sy verweer nie meer beskikbaar is nie.
PB het haar egter steeds nie laat keer nie en is op appèl grondwethof toe. In Oktober 2009 het die 11 regters van dié hof beslis dat sy mag voortgaan om haar klagte in ’n strafhof te laat bereg.
Oudregter Albie Sachs het onder meer gesê dit is ’n saak wat diep wonde kan veroorsaak, eerstens omdat PB weer al die angs van die voorval sal moet deurmaak as sy die waarheid praat – of andersyds omdat ’n bejaarde man dalk verniet deur die trauma van ’n verkragtingverhoor sal moet worstel.
“Die reg moet egter toegelaat word om sy gang te gaan.”
Verkragting is een van net ’n handjievol misdade in Suid-Afrika wat nooit verjaar nie. Alle ander misdade verjaar ná 20 jaar.
P. Groenewaldt, PB se regsverteenwoordiger, het Sondag bevestig dat die verhoor Maandag begin.
- Volksblad