Oudrugbyspeler en neef brand dood
2010-02-02 07:41
Jackie Kruger
George - “Danny-boy! O Here, Ivor...”
Dié noodkreet het gister in die vroeë oggendure deur Pacaltsdorp se strate weerklink toe ’n oudrugbyspeler van die Evergreensklub, Errol Scheepers (41), en sy neef, Ivor Londen (40), ’n vlammedood gesterf het.
Die twee mans het doodgebrand nadat drie houthuise wat langs mekaar was, hier vlamgevat het.
Londen se vriendin, Linda Stuurman (26), en Michelle Simon (26) wat saam met Scheepers was, is betyds deur Londen se jonger broer, Denver, uit die vlamme gered.
Denver en sy vriendin, Verona Botha, was in die derde houthuis toe die brand omstreeks 01:30 uitgebreek het. Botha het Denver wakker gemaak toe sy Stuurman hoor gil het.
Volgens Denver was die deur van sy broer se huis van buite gesluit en moes hy dit oopskop. Hy het Stuurman en Simon, wat in die tweede huis was, na buite gedra en wou teruggaan om sy broer en neef te red, maar die brand was reeds te erg.
Volgens Londen se ma, Joanna, wat in ’n vierde huis op die perseel woon, was alles binne enkele minute verby.
’n Buurvrou het die brandweer gebel, maar al drie huise was met hul aankoms reeds byna afgebrand.
Volgens ’n familielid van Simon, die Suid-Kaapse gospelsanger Gregory Noble, is Simon en Stuurman met graad 3-brandwonde na die George-hospitaal gebring en albei is gisteroggend vroeg geopereer.
Scheepers se ma, Maria Londen (haar getroude van), het gesê dit is die tweede tragedie wat die gesin tref.
Haar jongste seun, Roderick, is in 1996 op pad van ’n biduur met ’n mes doodgesteek. Sy moordenaar is nooit aangekeer nie.
Volgens ’n neef, Andre Scheepers, was Errol ’n kranige sportman wat veral in rugby uitgeblink het.
“Hy het vroeër as senter en heelagter vir Evergreens uitgedraf en het talle toekennings as die belowendste rugbyspeler verower.”
Malcolm Pojie, het gister gesê geen misdaad word vermoed nie, hoewel die moontlikheid van brandstigting nie uitgesluit word nie. ’n Geregtelike doodsondersoek word gedoen. Geen begrafnisreëlings is nog bekend nie.
- Die Burger