Oudpolisielid vas met onwettige wapens
2011-01-15 10:19
Die polisie het gister op die huis van ’n oudbrigadier in die polisie toegeslaan en beslag gelê op 31 vuurwapens en duisende patrone wat volgens genl. Bheki Cele, polisiehoof, “soos hoenders in die huis rondlê”.
“Ek het die eienaar gevra waar is die oorlog. Toe sê hy daar is nie ’n oorlog nie,” het Cele op die toneel gesê.
Die polisie het omstreeks 09:45 by die huis van oudbrig. Jack Roux in ’n kompleks in Heskethrylaan in Moreletapark, Pretoria, toegeslaan. Die hele kompleks behoort glo aan Roux.
Daar is ook beslag gelê op twee polisiedossiere – een oor ’n ontsnappingsaak en die ander oor die arrestasie van onwettige immigrante.
Cele het gesê die polisie sal kyk of Roux en sy wapens nie dalk met die onwettige jag van renosters verbind kan word nie.
Roux was voorheen verbonde aan die polisie se eenheid teen georganiseerde misdaad en het in 2003 afgetree. Hy is glo deesdae ’n beroeps- en sportjagter.
Cele het gesê Roux het wel vir 27 van die wapens lisensies. “Daar sal streng gekyk moet word na die wet – veral in die lig daarvan dat een persoon soveel lisensies het.”
Roux self het gesê hy het 36 wapens. Die polisie het gister egter net 31 gekry. “Die eienaar het gesê vyf van sy wapens is vermis,” het Cele gesê.
Een van die vyf vermiste vuurwapens moes volgens die polisie se inligting al vernietig gewees het, het Cele gesê.
Die polisie het onder meer beslag gelê op jaggewere, ’n 9 mm-pistool, ’n .44 Magnum-rewolwer, ’n 300 Winchester-pistool, ’n 227 Bruno-geweer, ’n Mauser en duisende patrone.
“Dié is nie ’n huis nie, dit is ’n weermagbasis. Die wapens lê soos hoenders in die huis rond. Die ammunisie het ook oral rondgelê,” het Cele gesê.
“Ek kan my net indink wat sou gebeur as iemand hier moes inbreek en die wapens en ammunisie gesteel het.”
Volgens Cele is gister se vonds gedoen nadat misdaadintelligensie-eenhede van Gauteng en Limpopo saamgewerk het. Weens Limpopo se deelname aan die ondersoek sal ’n moontlike betrokkenheid by renosterjag ondersoek word.
Oor die dossiere het Cele gesê die polisie gaan die sake weer ondersoek om agter die kap van die byl te kom.
Roux word by die Garsfontein-polisiekantoor aangehou op klagte van onder meer die onwettige besit van vuurwapens, polisie-eiendom en berging van vuurwapens.
- Volg Nuus24 op Twitter
- Beeld