Oudonderwyser erken seksdade met minderjariges
2010-08-05 10:01
Die Burger
George - ’n Oudonderwyser van dié dorp is Woensdag skuldig bevind daaraan dat hy seksuele dade met twee minderjarige seuns gepleeg het.
Hein Robertson (49), voorheen ’n onderwyser by ’n laerskool in George, was besig om ’n vonnis van drie jaar korrektiewe toesig uit te dien vir onsedelike aanranding en seksuele misdrywe toe hy hom tussen Desember 2008 en Mei 2009 weer skuldig gemaak het aan soortgelyke oortredings.
Robertson het ’n skriftelike skulderkenning gedoen op 29 aanklagte wat verband hou met die wet op seksuele misdrywe. Die bekentenis is Woensdag in die streekhof deur sy regsverteenwoordiger, Trevor Claassen, voorgelees. Die betrokke seuns was destyds onderskeidelik 15 en 17 jaar oud.
Luidens Robertson se bekentenis het hy die 17-jarige seun onder meer geld gegee vir seks, sy boude en geslagsdeel betas, ’n pornografiese DVD aan hom gewys en op ’n keer seks met hom gehad in ’n bos naby ’n vulstasie in George.
By een geleentheid het Robertson albei seuns opdrag gegee om mekaar seksueel te betas terwyl hy langs hulle gelê en masturbeer het.
Robertson het aan streeklanddros Marius Fourie gesê die inhoud van die skulderkenning is korrek en dat die bekentenis vrywillig gedoen is. In die verduideliking het Robertson erken dat wat hy gedoen het, verkeerd was.
Die slagoffers se ouers was nie Woensdag in die hof teenwoordig nie. Die seuns se getuienis is vroeër in camera aangehoor.
Robertson het in 2007 skuld beken op die vorige aanklagte van onsedelike aanranding van 12-jarige seuns van die laerskool hier waar hy ’n onderwyser en hokkie-afrigter was.
Hy is in 2007 gevonnis tot 18 maande tronkstraf, waarteen hy suksesvol appèl aangeteken het.
Hy is vir drie jaar onder korrektiewe toesig geplaas, waarvan nog sowat ’n jaar oorgebly het toe hy weer in hegtenis geneem is.
Fourie het die saak tot 19 Augustus uitgestel sodat die verdediging sekere verslae van die staatsaanklaer, Hankie Marx, kan bekom voordat Robertson gevonnis word. Die staat en die verdediging het hul saak afgesluit. Robertson is sedert Mei verlede jaar in aanhouding.
- Die Burger