Oud-sokkerspeler vas ná hy vrou met petrolbom gooi

2012-12-04 18:01

Johannesburg – 'n Voormalige sokkerspeler van Bloemfontein Celtic is in hegtenis geneem nadat hy 'n petrolbom in sy vrou se motor by hul huis in Wilgehof gegooi het, het die Vrystaatse polisie Dinsdag gesê.

"Die 34-jarige man is Maandagaand in hegtenis geneem," het kaptein Chaka Marope gesê.

Hy het na bewering 'n bottel vlambare vloeistof met 'n stuk lap aan die brand gesteek en in die vrou se motor gegooi nadat die egpaar in 'n rusie betrokke was.

"Die motor het aan die brand geslaan en die vrou het ernstige brandwonde aan haar gesig, hande en arms opgedoen," het Marope gesê.

Sy is deur haar bure gered en in die hospitaal opgeneem.

Die man sal na verwagting Donderdag in die Bloemfonteinse landdroshof op aanklagte van poging tot moord en kwaadwillige beskadiging van eiendom verskyn.

Volg Nuus24 op Twitter.

       

- SAPA