Oud-polisieman vas vir verkragting van dogter
2011-05-08 17:36
Johannesburg - ‘n Voormalige polisiebeampte is in Tzaneen in hegtenis geneem nadat hy na bewering sy dogter ontvoer en verkrag het, het die polisie in Limpopo Sondag gesê.
“Die verdagte het na bewering Woensdag sy biologiese dogter in Tzaneen ontvoer en die hele nag met haar in die motor gery deur Polokwane, Thohoyandou en Bolobedu. Hy het haar herhaaldelik in sy motor verkrag,” het brig. Hangwani Mulaudzi in ‘n verklaring gesê.
Hy was ook glo op soek na ‘n “giftige middel” om homself en sy 23-jarige dogter mee dood te maak. Hy het haar daarvan beskuldig dat sy vir mense vertel het dat hy haar seksueel mishandel het.
Sy het daarin geslaag om te ontsnap en die polisie in kennis te stel.
Die man mishandel sy dogter glo reeds sedert 2005, toe sy 17 was.
“Die kwessie is glo nooit aan die polisie gerapporteer nie omdat die familie probeer het om dit tuis uit te sorteer, sonder sukses. Die seksuele mishandeling het glo gelei tot die egpaar se egskeiding.”
Die man is in Bolobedu gevind, waar die polisie hom agtervolg en in hegtenis geneem het.
“Hy het met sy motor teen ‘n polisievoertuig vasgery. In die proses het die polisie hom in die been geskiet terwyl hulle probeer het om hom in hegtenis geneem.”
Die voormalige konstabel is onder polisiebewaking in ‘n plaaslike hospitaal opgeneem.
Hy sal na verwagting Maandag in die landdroshof op Tzaneen verskyn.
- Volg Nuus24 op Twitter
- SAPA