Oud-lyfwag van Zuma kry borgtog
2012-01-06 09:32
Kaapstad – ’n Gewese lyfwag van pres. Jacob Zuma en amptenaar van die nasionale vervolgingsgesag (NVG) is tans uit op borgtog van R30 000 nadat hy in Desember op aanklagte van korrupsie en bedrog in die Pretoria-streekhof verskyn het.
John Edward Maree (40) van Mamre, naby Atlantis, moet hom ingevolge sy borgtogvoorwaardes elke sewe dae by die Atlantis-landdroshof aanmeld.
Volgens inligting wat Die Burger ontvang het, het Maree homself vroeg in Desember aan die Valke in Gauteng oorgegee. Dit is onbekend wanneer hy een van Zuma se lyfwagte was.
Intussen toon die databank van korporatiewe eienaarskap (Cipro) dat Maree ’n direkteur is van Exclusive Access Trading, ’n maatskappy waarvan Duduzile Zuma, ’n dogter van pres. Zuma, ook ’n direkteur is.
Volgens Die Burger se bron het Maree die dag waarop hy in hegtenis geneem is verskeie oproepe na invloedryke mense in die Suid-Afrikaanse politieke wêreld gemaak om hulp te vra. Niemand was egter bereid om hul koppe vir hom uit te steek nie.
Maree en drie van sy voormalige kollegas by die NVG, sowel as die eienaar van Intense Protection and Tourists Services cc, verskyn weer aanstaande maand in die Pretoria-streekhof in verband met die aanklagte van bedrog, berig Hanti Otto.
Hofstukke beskryf die vyf – Maree, Tebogo Sethabela, Walter Rhoode, John Joubert en Muziwandile Nala, die eienaar van Intense Protection and Tourists Services cc – as ’n tenderbedrogsindikaat.
Hulle het na bewering gesorg dat ’n NVG-tender van meer as R19 miljoen onregmatig in 2006 aan Nala se onderneming toegeken is. Daar is ten tyde van die mans se borgtogaansoek getuig dat die geraamde bedrog amper R25 miljoen beloop.
Maree, Joubert en Rhoode was al drie verbonde aan die NVG se veiligheids- en risikobestuurseenheid. Volgens lt.kol. Frans Kola, ondersoekbeampte van die Valke, het die NVG in 2006 ’n tender vir veiligheidsdienste by verskeie van hul geboue in die land geadverteer. Dit is aan Nala toegeken. Nala het glo ’n onbekende bedrag geld aan Rhoode betaal “vir die uitsluitlike doel om die komitee te beïnvloed”.
Volg Nuus24 op Twitter
- Die Burger