'Oud-klofies se daad verg volwasse reaksie'
2010-08-29 11:24
Dit was ’n kinderagtige daad van drie seuns van ’n Pretoriase spogskool
om ’n foto van twee gay liggaamsbouers te manipuleer sodat hul onderhoof
daarin uitgebeeld word, maar dié daad het ’n volwasse reaksie nodig.
Dít
was die betoog van Ann Skelton, namens die Restorative Justice
Centre, Donderdag in die konstitusionele hof in Johannesburg.
Dié
organisasie, ’n vriend van die hof in die aangeleentheid, het gevra dat
die hof bepaal dat kinders wat van laster beskuldig word eers deur ’n
bemiddelingsproses gaan om soortgelyke hofsake te voorkom.
Dr.
Louis Dey, oudonderhoof van die Hoërskool Waterkloof, het die drie seuns
(nou oudleerlinge en nie meer minderjarig nie) vir meer as ’n
halfmiljoen rand vergoeding gedagvaar wees laster.
Die
hooggeregshof in Pretoria en die appèlhof in Bloemfontein het albei in
sy guns beslis en gelas dat die seuns hom R45 000 vergoeding betaal. Dit
is die eerste keer dat kinders van laster beskuldig word.
Hennie le Roux (toe 15) het in 2006 die foto gemanipuleer van die mans
wat “oënskynlik masturbeer” deur die gesigte van Dey en die skoolhoof,
dr. Christo Becker, daarop aan te bring. Die mans se geslagsdele is met
die skoolwapen bedek.
Christian Gildenhuys en Reinhardt Janse van Rensburg (albei toe 17) het dit op die skool se kennisgewingbord geplaas.
Hulle
het die konstitusionele hof gevra om die bevel tersyde te stel deur aan
te voer dat hulle naïewe kinders was wat nie bedoel het om skade te
berokken nie.
Adv. Anthony Stein, namens die Instituut vir
Vryheid van Spraak, wat ook as vriend van die hof toegelaat is, het gesê
hulle is bekommerd oor die implikasies wat dié saak kan hê.
Volgens
hom moet die verskansing wat gewoonlik geld vir parodieë, satire en
grappe soveel te meer op kinders van toepassing wees. Dít is omdat hulle
“daagliks gesag uitdaag” en die “reg” het om waaghalsiger te wees
wanneer hulle met uitdrukking eksperimenteer.
Stein het
beklemtoon dit beteken nie kinders moenie gestraf word nie, maar dat
hulle nie aanspreeklik behoort te wees in siviele gedinge van sake van
dié aard nie.
Skelton het gesê die kinders moes reeds drie keer
verantwoording doen vir hul dade. Die skool het hulle gestraf deur onder
meer gemeenskapsdiens af te dwing. Daarby is hulle strafregtelik
vervolg totdat hulle ’n afwentelingsprogram gedoen het én hulle moet die
lastereis trotseer.
Volgens adv. Gilbert Marcus SC, namens die
oudskoliere, het hulle “net ’n grap” gemaak. Volgens hom is dit
“kinderlike humor”. Hy het gesê kinders maak gereeld rympies en dit is
daarom nie vreemd dat kinders sal sê “Dey is gay” nie. “Op skool het ek
die bynaam ‘Carcass’ gehad omdat dit rym met Marcus.”
“Die kwessie wat hom (Dey) hoofsaaklik gekrenk het, is dat hy as ’n gay man uitgebeeld is.”
Dey is getroud en het kinders.
Adjunk-hoofregter
Dikgang Moseneke het gesê “ons weet Dey is nie gay nie, want hy sê so”.
Volgens hom was Dey ook gekrenk deurdat hy uitgebeeld is as iemand wat
dié soort seksuele gedrag toon.
Dey se regspan voer aan die seuns
was glad nie so onskuldig as wat hulle voorgee nie. Hulle het toegegee
dat hulle nie dié “grap” op hul ouers sou toepas nie.
Een het gesê hy sou dit ook nie met sy predikant gedoen het nie, “want jy mors nie met die dominee nie”.
Op
dié punt het regter Zak Yacoob gesê die eenvoudige rede hiervoor is
miskien “dat hulle lief is vir hulle ouers, maar nie lief is vir (Dey)
nie”.
Uitspraak is voorbehou.
- Rapport