Oud-jeugleier van Cope terug by ANC
2011-05-09 22:53
Johannesburg - Die ANC het die voormalige Cope-jeugleier en -LP Anele Mda Maandag terugverwelkom tot dié party by ‘n mediakonferensie in Johannesburg.
Mda was vroeër ‘n lid van die ANC-Jeugliga se uitvoerende komitee. Sy het egter oorgeloop na Cope toe dié in 2008 van die ANC afgestig het.
Sy het in dié stadium gesê die Cope-stigters “het van die trein af gespring toe hulle gesien het dit gaan nie in die rigting waarvan hulle hou nie”.
In November van daardie jaar moes Cope verskoning vra nadat Mda President Jacob Zuma luidens berigte ‘n “verkragter” genoem het, al is hy vrygespreek van verkragting in 2006.
Sy het luidens berigte in die aanloop tot die algemene verkiesing gesê as die ANC, onder Zuma, weer die verkiesing wen, “verkragting nie meer ‘n misdaad sal wees nie”.
Sy is minder as ‘n jaar later in September geskors nadat sy luidens berigte Cope se adjunk-sekretaris-generaal, Deidre Cartera, ‘n “simpel, aangewese, wit b*tch” genoem het.
Die skorsing is egter twee maande later gelig toe sy om verskoning gevra het vir “enige vooroordeel wat my uitsprake kon veroorsaak het”.
By ‘n dissiplinêre verhoor het sy skuldig gepleit op aanklagte dat sy rassistiese, seksistiese en polities onverdraagsame opmerkings teenoor Carter gemaak het.
Zuma was teenwoordig by die aankondiging van Mda se terugkeer tot die ANC, maar het nie gepraat nie. Gwede Mantashe, sekretaris-generaal, het die meeste van die praatwerk gedoen.
Mantashe het gesê die ANC nooi almal wat die party verlaat het om “terug te kom”.
Mda het haar besluit om tot die ANC terug te keer, verduidelik deur te sê Cope het geen politieke visie getoon nie.
“Ek is nou terug en ek is wyser,” het sy gesê. Sy is nog nie ‘n posisie binne die ANC aangebied nie.
- Volg Nuus24 op Twitter
- SAPA