Oud en jonk in dwelmsindikaat vasgetrek

2013-01-24 11:35

Johannesburg – Sewe lede van ‘n beweerde dwelmsindikaat is Donderdagoggend in Eldoradopark buite Soweto vir dwelmhandel in hegtenis geneem, het die polisie se elite-eenheid, die Valke, gesê.

Kapt. Paul Ramaloko sê die eenheid het “omtrent agt of nege maande” daaraan gewerk om hierdie verdagtes vas te trek nadat gemeenskapslede oor “dwelms soos CAT, tik en kokaïen” in die gebied gekla het.

Volgens die woordvoerder is die aangekeerde mans tussen die ouderdom van 21 en 70. Hulle is in hul huise vasgetrek.

Die polisie is nog op soek na vyf ander lede van die sindikaat, wat dwelms in Soweto en Eldoradopark versprei.

“Ons is daarvan oortuig dat ons ‘n waterdigte saak teen hulle in die hof het,” het hy gesê. Hulle sal volgende week in die Protea-landdroshof verskyn.

Ramaloko sê die Valke het die afgelope drie maande 12 dwelm-laboratoriums toegemaak en talle verdagtes in hegtenis geneem.

Volg Nuus24 op Twitter

- SAPA