Oud-burgemeester poog selfmoord

2009-11-10 07:24

Marietie Louw-Carstens

Johannesburg - ’n Oud-burgemeester van Bela-Bela (Warmbad) het hom gister buite die plaaslike koerant se kantoor in sy motor aan die brand gesteek.

Younus Lorgat (47) was teen druktyd in ’n kritieke toestand in die Milpark-hospitaal in Johannesburg. Hy het homself vol petrol gegooi en aan die brand gesteek by die kantoor van Die Pos in dié vakansiedorp in Limpopo.

Lorgat was tot 2007 burgemeester voordat hy as speaker van die Waterberg-distriksmunisipaliteit aangestel is. Hy het omstreeks 09:00 sy Toyota Avensis in ’n parkeerterrein aan die agterkant van Die Pos se kantoor geparkeer.

Kapt. Johnny Thiyo, polisiewoordvoerder, het gesê Lorgat het petrol oor hom uitgegooi en toe ’n vuurhoutjie getrek.

Personeellede van Die Pos het ’n slag gehoor en toe “rookwolke in die lug gesien”. Hulle het uit die gebou gehardloop en met brandblussers die vlamme in die motor geblus. Hulle het ook die nooddienste gebel.

Trompie Jonker, eienaar van Tromar- private nooddienste, het gesê Lorgat het eerste-, tweede- en derdegraadse brandwonde opgedoen. “Meer as 65% van sy liggaam is gebrand. Ek ken hom al lank, maar het hom gister glad nie eens herken nie.”

Hy het gesê veral Lorgat se gesig, arms, bo-lyf en bene het verbrand. “Hy het geprewel... dit het geklink of hy gebid het,” het Jonker gesê.

Lorgat is na die St. Vincent- private hospitaal in Bela-Bela geneem. Dokters en paramedici het daar sowat twee uur lank gespook om hom gestabiliseer te kry. Van sy familielede is in dieselfde hospitaal vir skok behandel.

Tromar het hom daarna met ’n ambulans na die hospitaal in Johannesburg vervoer.

Thiyo het gesê die polisie ondersoek die voorval.

“Dit is glad nie duidelik wat veroorsaak het dat hy homself aan die brand steek nie,” het hy gesê.

- Beeld