Oud-Bok kry wagte ná bomaanval
2010-01-20 06:19
Maygene de Wee
Constantia -Die oud-Springbokhaker Dale Santon gaan sekerheidswagte by sy huis aanstel om die veiligheid van sy gesin te verseker.
Santon, wat in ’n private hospitaal aansterk, het Dinsdag aan Die Burger gesê ook hy wil weet hoekom sy huis Saterdagoggend kort ná middernag met ’n petrolbom bestook is.
Hy het in die voorval tweedegraadse brandwonde opgedoen en moes ná sy opname in die hospitaal ’n dringende veloorplanting aan sy gesig en regterarm kry.
Die polisie het gesê Santon is “skoon”.
Insp. Keith Chandler, Dieprivier-polisiewoordvoerder, het by navraag gesê Santon se verlede, persoonlike lewe en huidige sakebedrywighede is ondersoek, maar niks vreemds is gevind nie.
Hy het gesê daar is nog geen verdagtes of motief nie.
Chandler het gesê daar is gevind die nommerplaat van die oranje BMW wat in die voorval gebruik is, is verlede maand in Grassy Park gesteel.
’n Ooggetuie wat gesien het hoe die BMW by Santon se huis stilhou, het daarin geslaag om die registrasienommer te memoriseer.
Die betrokke eienaar het aan die polisie gesê sy voertuig se buffer is saam met die nommerplaat gesteel.
Toe Die Burger Santon vra of hy aan enige rede kan dink hoekom iemand hom of sy gesin sou wil aanval, het hy gesê hy kan aan niks dink nie.
Hy het ook gesê hy het geen sakebedrywighede buiten sy vaste werk nie.
“Ek werk vir ’n baas en ons mag nie sake doen nie.
“Ek jol ook beslis nie en kan daarom nie dink hoekom iemand my huis sou wou bombardeer nie.”
–Die Burger