Oud-Bok kap Afriforum oor ‘kwotas’
2010-09-26 07:20
Rapport
Die oud-Springbokflank André Venter het die afgelope week sy stem dik gemaak en AfriForum se veldtog teen Absa as “ondeurdag” beskryf.
Dié gewese ysterman het sy mening kragtig gelug op die Facebook-groep Stop Absa Kwotas, wat deur AfriForum gestig is.
Venter het Saterdag aan Rapport gesê as jy in Suid-Afrika bly, is transformasie ’n werklikheid en almal moet daartoe verbind wees. Hy het ook gesê daar is baie groter kwessies in die land om te takel.
“Ons baklei ons dinges af om die Springbok-embleem te behou; dan kom AfriForum met so ’n veldtog. Wie wil ons hê moet ons eerder oor ontwikkeling en transformasie waarsku: iemand wat passievol is oor rugby, of moet dit van die regering se kant af kom?
“AfriForum plaas onnodig fokus op goed. Hulle is erger as die ANC-jeugliga. Hulle dink dis die enigste manier om die goed te hanteer as hulle kwessies aanblaas, maar dit kan net backfire.”
Venter het gesê niemand wil kwotas terug in rugby sien nie.
En sowel Absa as die Suid-Afrikaanse Rugbyunie (Saru) het die afgelope week wéér beaam Oregan Hoskins, Saru-president, se e-pos aan die unies en Louis von Zeuner, Absa se adjunk- uitvoerende hoof, se SMS aan Hoskins oor transformasie is geensins ’n oproep dat kwotas teruggebring word nie.
“Ons moet alle spelers ontwikkel,” het Venter gesê. “Daar is ’n groot verskil tussen transformasie en kwotas. Die een beteken om mense op te lei en hulle die geleentheid te gee, en die ander om mense in posisies te sit waarvoor hulle nie opgewasse is nie. Daar is genoeg spelers wat great is en die unies moet hulle ’n kans gee.”
Venter het gesê hy het saam met “uiterse goeie spelers” soos Breyton Paulse, Ashwin Willemse, Chester Williams en Tonderai Chavhanga gespeel.
“Hulle het mens nooit ooit gedrop nie. Wat wil AfriForum hierdeur bereik? Hulle veroorsaak net weer agterdog tussen mense.
Die ouens wat die lekkerste na die sokker en rugby in die sjebiens in Soweto gaan kyk het, wil nou hulle Absa-rekeninge sluit.
“Alles wat tóé opgebou is, word nou afgebreek. En wat sou AfriForum doen as die borg SAB was: Sou almal dan opgehou het om bier te drink?”
Hoskins het ook die afgelope week in ’n onderhoud aan iafrica. com gewaarsku dat indien daar nie oor transformasie gepraat word nie, rugby wéér op ’n ramp afstuur.
“Ons praat nie van kwotas nie. Ek het geensins kwotas opgehaal nie. Al wat ek gevra het, is hoekom is dit so dat daar groot getalle spelers van kleur is in die klein unies, maar hulle dring nie deur na die vyf grotes nie.
“As ons nie transformasie behoorlik, metodies, dinamies en regverdig doen nie, dan stuur ons af op ’n ramp. Dan stuur ons weer af op dinge soos ’n kwota-stelsel of wetgewing wat die regering wil inbring.”
Hoskins het gesê dit is deel van Saru se beleid om transformasie te takel en dit word jaarliks gedoen. “Dit is ’n proses en nie ’n eindpunt nie.”
- Rapport