Oscar wil weer hardloop
2013-02-26 07:15
Johannesburg – Die Paralimpiese atleet Oscar Pistorius wil glo weer wil begin atletiek oefen terwyl hy op borgtog uit is, het RSG Dinsdagoggend berig.
'n Woordvoerder vir Pistorius, Janine Hills, het volgens die radiostasie egter ontken dat hy planne maak om dadelik na die baan terug te keer.
Hills het gesê Pistorius het sy borgvoorwaardes met sy paroolbeampte en 'n amptenaar van korrektiewe dienste by die Pretoriase landdroshof bespreek. Dié voorwaardes sal sy daaglikse roetine bepaal tot hy weer op 4 Junie in die hof verskyn.
James Smalberger, woordvoerder vir die departement van korrektiewe dienste, het ook aan die stasie bevestig dat Pistorius weer wil begin oefen.
Smalberger het gesê Pistorius se afrigter sal 'n oefenprogram moet indien sodat hulle bewus kan wees van sy bewegings.
Die Paralimpiese atleet word daarvan beskuldig dat hy die 29-jarige Reeva Steenkamp op Valentynsdag in sy huis in die ooste van Pretoria vermoor het. Pistorius, wat sedert November verlede jaar in 'n verhouding met Steenkamp was, het die aanklag ten sterkste betwis.
– Lees hier meer.
– Volg Nuus24 op Twitter.
