Oscar vertel van doods-dreigemente, skietery
2013-02-19 15:04
Pretoria – Die Paralimpiese atleet Oscar Pistorius het in 'n beëdigde verklaring gesê niks kan verder van die waarheid wees as die bewering dat hy Reeva Steenkamp vermoor het nie.
"Ek ontken die bewering ten sterkste. Niks kan verder van die waarheid wees nie," het die atleet gesê in 'n verklaring wat adv. Barry Roux, sy regsverteenwoordiger, in die hof voorgelees het.
Pistorius was betraand tydens die hofverrigtinge, maar toe die verklaring, gemerk "bewysstuk A", uitgehaal is, het hy onbeheerbaar begin huil.
Die ster-atleet het in die verklaring gesê Steenkamp het vir hom 'n Valentynsdaggeskenk gegee en dat hy nie "gelukkiger kon wees nie".
"Sy het vir my 'n geskenk vir Valentynsdag gegee en aan my gesê om dit die volgende dag oop te maak," lui die verklaring.
Op die vooraand van Valentynsdag sou Steenkamp met haar vriende uitgaan en Oscar met syne, maar hulle het besluit om 'n rustige ete by die huis te hê.
Pistorius het in sy verklaring gesê hy en Steenkamp het in die bed geklim en later aan die slaap geraak.
"Ek het voorheen doodsdreigemente ontvang," het hy verder gesê.
Pistorius het 'n 9 mm-vuurwapen onder sy bed gehad.
Hy het gesê hy kan sonder sy kunsbene rondbeweeg en loop.
Pistorius sê hy het in die nag 'n geluid in die badkamer gehoor en was "gevul met vrees en afgryse". Hy het iemand hoor sê "dit is pikdonker in die badkamer".
"Omdat ek nie my kunsbene aangehad het nie, was ek kwesbaar. Ek het 'n skoot na die toiletdeur gevuur en vir Reeva geskree om die polisie te bel.
"Ek het baie kwesbaar gevoel omdat ek nie my kunsbene aangehad het nie en ek geweet het ek moet myself en Reeva beskerm," lui die verklaring verder.
"Toe ek by die bed kom, het ek besef Reeva is nie in die bed nie."
Pistorius het gesê hy het probeer om die badkamerdeur oop te maak, maar dit was gesluit. Hy het toe na die balkon gegaan om vir hulp te roep.
Hy het daarna sy kunsbene aangesit, die badkamerdeur met 'n krieketkolf oopgebreek en 'n sleutel gekry om dit oop te sluit.
"Reeva was gebukkend, maar steeds lewend."
Hy het haar by die trappe afgedra om haar hospitaal toe te neem toe 'n dokter, wat in die kompleks woon, by die huis aangekom het.
"Sy het in my arms gesterf."
– Volg Nuus24 op Twitter
- SAPA
