Oscar slaap in selle

2013-02-14 18:07

Kaapstad – Die Paralimpiese atleet Oscar Pistorius sal oornag in polisieaanhouding bly en sal Vrydagoggend in die Pretoria-landdroshof verskyn op 'n aanklag van moord, het die nasionale vervolgingsgesag (NVG) gesê.

Pistorius het na bewering sy vriendin, Reeva Steenkamp, Donderdag in die vroeë oggendure in sy huis in 'n gholflandgoed in Pretoria doodgeskiet.

"Hy sal in polisieaanhouding bly," het Medupe Simasiku, woordvoerder vir die NVG, Donderdag gesê.

Pistorius het die Boschkop-polisiestasie vroeg Donderdagmiddag saam met polisiebeamptes verlaat. Hy het 'n top met 'n kappie wat laag oor sy gesig is, aangehad. Hy het afgekyk terwyl fotograwe foto's van hom geneem het.

Borg stil oor Pistorius

Intussen het die internasionale sportdraghandelsmerk Nike Donderdag geweier om kommentaar te lewer oor die maatskappy se toekomstige verhouding met Pistorius.

"Hierdie is 'n polisiesaak en word steeds ondersoek," het Seruscka Naidoo, woordvoerder vir Nike SA, gesê.

"Van Nike deel ons ons medelye met almal wat hierdeur geraak word."

Nike is een van Pistorius se vyf grootste borge. Hy het sedert 2008 in 'n paar advertensies van die maatskappy verskyn.

'Geen ander verdagte'

Die polisie identifiseer nie verdagtes voor hulle in die hof verskyn nie, maar brig. Denise Beukes, 'n polisiewoordvoerder, het bevestig dat Pistorius by sy huis was ten tye van Steenkamp se dood. Sy het gesê daar is "geen ander verdagte betrokke" nie.

"Ja, daar is getuies en daar was ook vanoggend onderhoude," het Beukes aan verslaggewers buite die gholflandgoed waar die voorval plaasgevind het, gesê.

"Ons praat oor bure en mense wat dinge gehoor het wat vroeër in die aand plaasgevind het."

Die polisie het aan die media bevestig dat daar voorheen bewerings van insidente "van 'n huishoudelike aard" by Pistorius se huis was. Dit is egter nie bekend of dit tussen hom en Reeva Steenkamp was nie.

– Volg Nuus24 op Twitter.

- SAPA