Oscar slaap glo op die grond

2013-02-21 10:40

Pretoria – Die aanhoudingselle by die Brooklyn-polisiekantoor in Pretoria waar Oscar Pistorius aangehou word, het geen beddens nie, het Beeld Donderdag berig.

Pistorius slaap dus op die grond, vermoedelik op beddegoed wat sy familie gebring het en deel soms 'n sel met ander gevangenes.

"Ek kan nie met sekerheid sê met hoeveel mense hy 'n sel deel nie, veral omdat mense vrygelaat of na ander tronke verskuif word," het brig. André Wiese, stasiekommissaris, aan die koerant gesê.

Wiese het verder gesê hy kan nie bekendmaak wat Pistorius eet nie, omdat die maaltye afhang van watter bestanddele beskikbaar is.

"Al wat ek kan sê is dat hy met dieselfde menswaardigheid as enige ander gevangene behandel word."

Wiese het ook bevestig dat elke gemeenskaplike aanhoudingsel slegs een stort en toilet het.
      
– Volg Nuus24 op Twitter

- SAPA