Oscar se familie wag vir borgtog-uitkoms

2013-02-22 08:20

Johannesburg – Oscar Pistorius se familie het gesê hulle respekteer die prosesse wat gepaardgaan met die atleet se borgtogaansoek.

Hooflanddros Desmond Nair het Donderdag die hofverrigtinge in die Pretoriase landdroshof afgesluit sonder 'n aanduiding of borgtog aan Pistorius toegestaan sal word of nie.

"Oscar Pistorius en sy familie respekteer die proses van die borgtogverhoor," het Arnold Pistorius, die atleet se oom en familiewoordvoerder, in 'n verklaring gesê.

"Hulle verstaan dat dit in die volle belang van geregtigheid is dat die proses wat gepaardgaan met die borgtogaansoek in sy geheel gevolg moet word."

Die verklaring is deur die reklamemaatskappy Vuma Reputation Management uitgereik.

Pistorius se borgtogaansoek sal Vrydag die vierde dag betree.

Hy word daarvan beskuldig dat hy sy vriendin, Reeva Steenkamp, verlede week in sy huis in die ooste van Pretoria doodgeskiet het.

"Dit is 'n unieke, emosionele en moeilike tyd vir ons almal. Ons harte en gebede is met die familie van Reeva Steenkamp in hul tyd van smart," het Arnold gesê.
      
– Volg Nuus24 op Twitter

- SAPA