Oscar se borgtogaansoek vertraag
2013-02-21 11:53
Pretoria – 'n Nie-praktiserende prokureur het Donderdag Oscar Pistorius se borgtogverhoor met 'n paar minute in die Pretoriase landdroshof vertraag.
Die vrou, wat slegs bekend is as Annemarie, het gesê sy wil hooflanddros Desmond Nair toespreek oor die atleet se sielkundige toestand. Sy het gesê dit is 'n grondwetlike saak, berig Sapa.
Pistorius, wat van die moord op sy vriendin, Reeva Steenkamp, aangekla word, het dié misdaad in 'n beëdigde verklaring ontken.
Sy borgtogaansoek is verder vertraag toe Nair wou weet hoekom ao. Hilton Botha, hoofondersoekbeampte, nie in die hof is nie.
Dít volg ná die nuus dat sewe aanklagte van poging tot moord teen Botha heringestel is.
Adv. Gerrie Nel, staatsaanklaer, het gesê hulle het Woensdag uitgevind dat die aanklagte teen Botha heringestel is.
Nel het gesê Botha het verkies om nie die hofverrigtinge by te woon nie.
Die hof is toe 15 minute lank verdaag sodat Botha geroep kan word om voor Nair te verskyn.
– Volg Nuus24 op Twitter
