Oscar se afrigter hoop vir borgtog

2013-02-22 10:43

Pretoria – Oscar Pistorius se afrigter, Ampie Louw, het gesê hy hoop die atleet se borgtogaansoek in die Pretoriase landdroshof is suksesvol.

"Ons voel die waarheid moet uitkom, ons voel baie positief en ons wil hom net by die huis hê," het Louw Vrydag voor Pistorius se borgtogaansoek gesê.

"In die stadium is dit 'n prioriteit."

Hy wou nie kommentaar lewer oor hoe Pistorius die saak hanteer nie omdat hy hom nog nie kon besoek nie en slegs in die hof gesien het.

Pistorius word daarvan aangekla dat hy sy vriendin, Reeva Steenkamp, in sy huis in die ooste van Pretoria doodgeskiet het.

Op die vraag hoe Pistorius vir hom voorkom, het Louw gesê: "Hy is hartseer. Hy is baie hartseer."

Pistorius se borgtogaansoek het Vrydag 'n vierde dag betree. Hofverrigtinge begin om 10:00 wanneer die staat sy slotbetoë sal voortsit.

– Volg Nuus24 op Twitter

- SAPA