Oscar-saak 'nie enigste rede' vir bedanking
2013-03-07 17:58
Kaapstad – Hilton Botha, voormalige ondersoekbeampte in die Oscar Pistorius-moordsaak, het gesê sy bedanking hou nie heeltemal verband met dié saak nie.
Botha het Woensdag met onmiddellike effek uit die Suid-Afrikaanse Polisiediens bedank om by 'n privaat maatskappy aan te sluit.
Hy het gesê 10% van sy besluit was gebaseer op die Pistorius-saak.
"Dit hou nie heeltemal verband daarmee nie. Ek soek al vir 'n geruime tyd 'n werk met beter betaling en ek het die werk gekry wat my instaat sal stel om volgende jaar my seun se studiegeld te betaal," hy aan Jacaranda FM gesê.
Op die vraag oor die Oscar Pistorius-saak, het hy gesê hy sou meer ondersteuning in die saak waardeer het.
"Ek sou in die eerste paar dae van die saak meer ondersteuning geniet het, maar die ondersteuning het 'n rukkie later gekom en toe iemand gekom het om te help, was dit byna te laat."
Botha het gesê hy dink die huidige hoofondersoekbeampte, Vinesh Moonoo, het genoeg ondersteuning om 'n goeie taak te verrig.
Sy bedanking sal nié die Pistorius-saak beïnvloed nie en hy sal beskikbaar wees indien hy in die hof benodig word.
Pistorius word daarvan beskuldig dat hy sy vriendin, Reeva Steenkamp, op 14 Februarie in sy huis in die ooste van Pretoria doodgeskiet het. Hy is verlede maand borgtog van R1 miljoen toegestaan en sal weer op 4 Junie in die hof verskyn.
Botha is as hoofondersoekbeampte in die saak vervang nadat dit aan die lig gekom dat hy deur sewe aanklagte van poging tot moord in die gesig gestaar word.
Dié saak is aanvanklik teruggetrek, maar is op 4 Februarie heringestel.
Botha en twee ander beamptes is 'n jaar gelede in hegtenis geneem nadat hulle losgebrand het op 'n taxi wat passasiers vervoer. Die drie was ook na bewering dronk terwyl hulle 'n staatsvoertuig bestuur het.
– Volg Nuus24 op Twitter
