Oscar, regspan vergader tot die laaste minuut

2013-02-20 10:28

Pretoria – Die moordbeskuldigde Oscar Pistorius het Woensdagoggend tot op die laaste nippertjie met sy regspan vergader om voor te berei vir die volgende fase van sy borgtogaansoek.

Pistorius se borgtogaansoek het Dinsdag begin en het Woensdag voortgeduur.

Die Paralimpiese atleet word daarvan beskuldig dat hy die model Reeva Steenkamp op Valentynsdag in sy huis in die ooste van Pretoria doodgeskiet het.

Hy het omstreeks 06:45 by die hof opgedaag.

Behalwe die borgtogaansoek moet sy regsverteenwoordigers ook nóg 'n aansoek indien om hom by die polisie-aanhoudingselle in plaas van die tronk te hou. Die bevel wat verlede week uitgereik is, verval Woensdag.

Pistorius se familie, waaronder sy broer, Carl, en sy suster, Aimee, was ook Woensdag in die hof.

Hy het Dinsdag in die sterkste terme ontken dat hy Steenkamp vermoor het.

– Volg Nuus24 op Twitter