Oscar oornag agter tralies

2013-02-14 15:10

Kaapstad – Die Paralimpiese atleet Oscar Pistorius sal oornag in polisieaanhouding bly aangesien hy eers Vrydag in die hof sal verskyn.

Pistorius sal waarskynlik aangekla word van die moord op sy vriendin, wat vanoggend in sy huis in Pretoria doodgeskiet is.

Reeva Steenkamp, 'n model wat haar op Twitter uitgespreek het teen verkragting en geweld teen vroue, is vier keer in die vroeë oggendure geskiet in die huis in 'n gholflandgoed in Pretoria, het die polisie gesê.

Pistorius het die Boschkop-polisiestasie vroeg Donderdagmiddag saam met polisiebeamptes verlaat. Hy het 'n top met 'n kappie wat laag oor sy gesig is, aangehad.

Hy het afgekyk terwyl fotograwe foto's geneem het.

Die polisie identifiseer nie verdagtes voor hulle in die hof verskyn nie, maar brig. Denise Beukes, 'n polisiewoordvoerder, het bevestig dat Pistorius by sy huis was ten tye van Steenkamp se dood. Sy het gesê daar is "geen ander verdagte betrokke" nie.

"Ja, daar is getuies en daar was ook vanoggend onderhoude," het Beukes aan verslaggewers buite die gholflandgoed gesê.

"Ons praat oor bure en mense wat dinge gehoor het wat vroeër in die aand plaasgevind het."

Die polisie het aan die media bevestig dat daar voorheen bewerings van insidente "van 'n huishoudelike aard" by Pistorius se huis was. Dit is egter nie bekend of dit tussen hom en Reeva Steenkamp was nie.

"Ons is baie verbaas om die bewerings te hoor dat hy sy meisie vir 'n inbreker aangesien het," het die polisie vroeër gesê.

"Ons het berigte ontvang dat daar geskree was, maar niks is bevestig nie. Dit is deel van 'n ondersoek wat nog nie afgehandel is nie."

Beukes het gesê forensiese kenners is op die toneel en sal bepaal of daar gedwonge toegang was.

Pistorius het vroeër gevra om onmiddellik in die hof te verskyn, maar die hofrol was te vol vir Donderdag.

"Een van die redes hoekom ons borgtog teenstaan, sal bekend gemaak word wanneer hy in die hof verskyn," het Beukes gesê.

– Volg Nuus24 op Twitter.

- Sapa - AP