Oscar is gekant teen geweld – minister

2013-02-20 09:25

Johannesburg – Fikile Mbalula, minister van sport, het sy skok en ongeloof uitgespreek nadat die atleet Oscar Pistorius van die moord op sy vriendin, Reeva Steenkamp, aangekla is.

"Ons glo sterk dat niemand bo die wet verhewe is nie," het Mbalula gesê nadat Pistorius Dinsdag in die hof verskyn het.

"Ons sporthelde moenie verbind word met dade van geweld teen vroue en kinders nie."

Mbalula het Pistorius beskryf as 'n rolmodel en internasionale ikoon en gesê hy beskou die voorval in "ongeloof" te midde van die toenemende geweld teen vroue.

"Baie vrae word gevra, maar ons het nie antwoorde nie. Die hof sal dit verskaf."

Mbalula het verder gesê Pistorius is gekant teen geweld.

"Ons leef in 'n wêreld waar ons rolmodelle wil bou wat 'n voorbeeld in die samelewing en die jeug kan wees," het Mbalula in 'n verklaring gesê.

"Om dié rede was Oscar ons fakkeldraer en internasionale ikoon wat gekant was teen die mishandeling van menseregte."

Pistorius se borgtogaansoek sal Woensdag in die Pretoriase landdroshof voortduur. Hy is verlede Donderdag in hegtenis geneem nadat Steenkamp in sy huis doodgeskiet is.
       
– Volg Nuus24 op Twitter

- SAPA