Oscar 'erg getraumatiseerd'
2013-02-15 16:29
Johannesburg – Oscar Pistorius se regsverteenwoordigers het vroeër tydens die hofverrigtinge gesê sy kliënt is "erg getraumatiseer.”
Die media het vroeër 'n aansoek ingedien om die saak regstreeks uit te saai, maar die verdediging het gesê weens die atleet se "erg getraumatiseerde toestand" wil hulle nie hê die saak moet uitgesaai word nie.
Hooflanddros Desmond Nair het beslis dat die verrigtinge nie uitgesaai kan word nie, maar het bandopnames en foto's toegelaat wanneer die hof nie in sitting is nie.
Pistorius het vroeër vir die eerste keer in die hof verskyn nadat sy vriendin, Reeva Steenkamp, in sy huis in Silver Lakes, Pretoria, doodgeskiet is. Hy is amptelik van haar moord aangekla.
Die staat het aangevoer dat die saak 'n skedule 6-misdaad is, maar die verdediging het gesê hy kan nie sien hoekom dít gedoen moet word nie.
Die sportheld se snikke kon in die openbare galery gehoor word. Hy het verskeie kere sy kop in sy hande gesak.
Sy pa, Henke, en sy broer en suster, Aimee en Carl, het die hofverrigtinge bygewoon. Die sakeman Kenny Kunene is ook in die openbare galery gesien.
Die familie het later ‘n verklaring uitgereik, waarin hulle die aanklag van moord “ten sterkste betwis.”
"Hy (Oscar) het dit baie duidelik gestel dat hy sy diepste meegevoel met Reeva se familie betuig."
Pistorius bedank ook mense wat vir hom ondersteuningsboodskappe gestuur het, maar benadruk dat daar vir Reeva en haar familie gebid moet word "ondanks die omstandighede rondom hierdie aaklige, aaklige tragedie".
Volg Nuus24 op Twitter
- SAPA
