Oscar besoek skietbaan as hy nie kan slaap
2013-02-15 08:09
Kaapstad – Die Paralimpiese atleet Oscar Pistorius se klaarblyklike voorliefde vir vuurwapens het Vrydag oor die wêreld heen die aandag getrek, en veral 'n onderhoud wat hy met die New York Times se Michael Sokolove gehad het, is onder die vergrootglas.
Pistorius het na bewering Donderdag in die vroeë oggendure sy vriendin, Reeva Steenkamp, in sy huis doodgeskiet.
Sokolove het in ’n artikel onder die opskrif “The Fast Life of Oscar Pistorius” vertel hoe Pistorius hom destyds na ’n skietbaan geneem het, waar hy oor sy voorliefde vir vuurwapens gepraat het.
“Pistorius was ’n goeie afrigter. Ek het ’n paar kolskote gehad en dit het hom vreeslik opgewonde gemaak.”
In dié stuk vertel Sokolove ook hoe Pistorius een aand dadelik na 'n vuurwapen gegryp het toe 'n alarm in sy huis afgegaan het.
Pistorius het ook aan dié verslaggewer gesê hy besoek 'n skietbaan as hy nie kan slaap nie.
“Ek is in die bed om en by agtuur, en ek klim nie uit die bed voor sewe nie,” het hy gesê. “Maar ek slaap net die helfte van die tyd.”
Later in die onderhoud het Sokolove hom gevra of hy dikwels sy plaaslike skietbaan besoek.
"Net partykeer, wanneer ek nie kan slaap nie," het hy geantwoord.
'n Artikel in die Daily Mail, wat geskryf is deur die joernalis Jonathan McEvoy, het onder die opskrif “Inside Oscar’s bedroom: One cricket bat, baseball bat, revolver and machine gun” vertel hoe Pistorius 'n pistool en masjiengeweer langs sy bed bêre.
Pistorius is in aanhouding, en sal later Vrydag na verwagting in die Pretoria-landdroshof verskyn.
– Volg Nuus24 op Twitter.
