Oscar: Vriendin se familie 'verpletter'
2013-02-14 10:23
Pretoria – Die vrou wat in die Paralimpiese atleet Oscar Pistorius se huis doodgeskiet is, is geïdentifiseer as die model Reeva Steenkamp, het Beeld en City Press berig.
'n Vriend na aan die familie het Donderdagoggend aan City Press bevestig dat dit Steenkamp is wat in Pistorius se huis dood is, en gesê die familie is “verpletter”.
Pistorius word deur die polisie ondervra ná die voorval wat omstreeks 04:00 Donderdagoggend by sy huis in die ooste van Pretoria plaasgevind het. Beeld het vroeër berig dat hy na wat verneem word "erg geskok" is oor die gebeure.
Kate Silvers, Pistorius se skakelbeampte in Londen, het gesê sy wil nie in hierdie stadium kommentaar lewer nie.
"Ons sal moontlik later 'n verklaring uitreik," het sy gesê.
Peet van Zyl, Pistorius se bestuurder, en Ampie Louw, die Pretorianer se afrigter, kon nog nie vir kommentaar bereik word nie.
Foto’s van Pistorius en sy vriendin het Sondag in die Sunday Times verskyn. Sy het Pistorius beskryf as 'n onberispelike man wat altyd haar belange op die hart dra.
"Paramedici het die vrou op die toneel dood verklaar en die polisie het voortgegaan met hul ondersoek. Die vrou is in haar kop en bolyf gewond," het lt.kol. Katlego Mogale, polisiewoordvoerder, gesê.
Die 30-jarige vrou is op die toneel dood en die polisie het beslag gelê op 'n 9mm-vuurwapen.
Mogale, wat nie wou bevestig dat dit Pistorius is nie, het gesê 'n 26-jarige man is in aanhouding en 'n saak van moord word ondersoek.
Pistorius het Steenkamp glo as 'n inbreker aangesien.
Kalay Maistry, 'n Suid-Afrikaanse joernalis, het aan Sky News gesê Pistorius se vriendin het hom glo probeer verras vir Valentynsdag.
"Ek dink dit benadruk die vrees wat gewone Suid-Afrikaners ervaar.
"Dit is 'n man wat gaan slaap het, dit is 'n onskuldige verrassing van 'n meisie... en die oomblik wat hy dink iemand probeer inbreek, gryp hy sy vuurwapen."
– Volg Nuus24 op Twitter
