Oscar: Ondersoekbeampte nié gepos
2013-02-21 11:27
Kaapstad – Die polisie het Donderdag gesê geen besluit is nog geneem om ao. Hilton Botha, hoofondersoekbeampte in die Oscar Pistorius-moordsaak, van die saak te onttrek nie.
Dít volg nadat sewe aanklagte van poging tot moord teen hom heringestel is.
"Ons het nog nie 'n besluit daaroor geneem nie. Vir nou is hy steeds op die saak," het Neville Malila, polisiewoordvoerder, gesê.
Dit het Donderdag aan die lig gekom dat Botha voorheen in hegtenis geneem is nadat hy na bewering dronk was toe hy op 'n voertuig met passasiers geskiet het. Hy en twee ander polisiebeamptes sal in Mei weer in verband met die voorval in die hof verskyn.
Die drie staan tereg op sewe aanklagte van poging tot moord.
Die nasionale vervolgingsgesag het aan Eyewitness News bevestig dat die aanklagte teen Botha tien dae voor die voorval by Pistorius se huis heringestel is.
Pistorius word daarvan beskuldig dat hy sy vriendin, die model Reeva Steenkamp, verlede week by sy huis in die ooste van Pretoria doodgeskiet het.
Sy borgtogaansoek sal Woensdag vir 'n derde dag voortduur.
Botha het vroeër gesê die aanklagte wat heringestel is teen hom, kan dalk verbind word met sy ondersoek na die Pistorius-moordsaak.
"Ek verstaan nie hoekom die aanklagte Woensdag heropen is nie. Ek kan net dink dit hou verband met my werk oor Oscar Pistorius," het Botha aan die eNCA-nuuskanaal gesê. Die NVG het later bevestig dat die aanklagte teen Botha reeds voor die aanval heringestel is.
– Volg Nuus24 op Twitter
