Oscar: Joernalis word flou in mediastorm
2013-02-20 10:15
Pretoria – 'n Joernalis het Woensdagoggend flou geword by die Pretoriase landdroshof in 'n mediastorm vir plek in die volgepakte hof C, berig Sapa.
Karyn Maughan van die eNCA-nuuskanaal het later op Twitter gesê sy is weer piekfyn.
Sowat 100 joernaliste is by die hof, maar slegs 26 word in die hofsaal toegelaat. Fotograwe is in die hofsaal toegelaat en is tyd gegee om foto's te neem, daarna moes hulle die hofsaal verlaat.
Die saak het teen 10:00 nog nie begin nie, omdat 'n skerm in 'n aangrensende lokaal opgestel is vir lede van die media.
Intussen het die departement van justisie probeer hard om al die media by die Oscar Pistorius-moordsaak te akkommodeer, het 'n woordvoerder gesê.
Die storie het wêreldwyd opslae gemaak en plaaslike en internasionale joernaliste het na die Pretoriase landdroshof gestroom, berig die SABC.
Lulama Luti, woordvoerder van die departement, het gesê nóg 'n lokaal is beskikbaar gestel vir die media.
"Wat ons vir vandag gereël het, is 'n lokaal waar die verrigtinge regstreeks uitgesaai gaan word. Ons probeer ons bes om al die joernaliste te akkommodeer."
Pistorius het Woensdagoggend omstreeks 06:45 by die hof aangekom.
Hy word daarvan beskuldig dat hy die model Reeva Steenkamp in sy huis in die ooste van Pretoria doodgeskiet het. Die atleet hou vol dat dit 'n ongeluk was, maar staatsaanklaers glo daar is meer aan die storie as Pistorius se weergawe.
– Volg Nuus24 op Twitter
