Oscar: Doepa vir seks by sy bed
2013-02-24 10:34
Johannesburg – Die “testosteroon” wat in Oscar Pistorius se huis gevind is, is inderwaarheid ’n kruiemiddel wat mans gebruik om hulle woema tussen die lakens te gee, berig Rapport.
Volgens Pistorius se regspan is die middel waarop die polisie verlede week ná die skietdood van Reeva Steenkamp beslag gelê het die wettige homeopatiese middel Testis compositum.
Die middel word meestal gebruik om seksuele uitputting teen te werk, maar atlete word aangeraai om dit te vermy omdat dit moontlik hul testosteroonvlak kan verhoog, sê dr. Jon Patricios, ’n sportgeneeskundige.
Volgens die middel se voubiljet behandel Testis compositum toestande wat wissel van impotensie en vroeë ejakulasie tot lewerskade en bednatmaak.
In sy uitspraak in Pistorius se borgtogaansoek Vrydag het landdros Desmond Nair bevind ao. Hilton Botha, die ondersoekbeampte wat intussen aan die saak onttrek is, het drooggemaak toe hy in die hof aangevoer het die middel is testosteroon.
Pistorius se regspan het by sy borgtogaansoek volgehou dít waarop die polisie beslag gelê het, is ’n wettige kruiemiddel.
Hulle het by monde van die atleet se woordvoerders aan Rapport gesê die middel is testo-compositum, maar wou nie aandui of Pistorius wel die produk gebruik het nie of waarom dit in sy besit was nie.
“Daar is verskillende vervaardigers van soortgelyke produkte met verskillende name.
“Die aktiewe bestanddele is testo-compositum en koënsiem-Q,” sê Patricios.
Dit is beskikbaar in tabletvorm en inspuitbare ampules en hoewel albei voorheen oor die toonbank verkoop is, benodig ’n mens deesdae ’n voorskrif van ’n homeopaat of algemene praktisyn om die middel te bekom.
Pistorius se regspan het nie teen druktyd aangedui of die middel wat in hul kliënt se besit gevind is die inspuitbare weergawe is nie en of hy ’n voorskrif daarvoor gehad het nie.
“Dit is nie ’n anaboliese steroïed nie en dit is onwaarskynlik dat dit aanleiding sal gee tot irrasionele woede,” sê Patricios.
– Volg Nuus24 op Twitter
